Մեծի Տանն Կիլիկիոյ Արամ Ա. կաթողիկոսի գահակալութեան 20-ամեակին առիթով տեղի ունեցող համերգներու ծիրին մէջ, հինգշաբթի, 24 նոյեմբեր 2016-ի երեկոյեան ժամը 8:30-ին, Ազգային ակադեմական երգչախումբը ներկայացուց Քարլ Օրֆի «Քարմինա Պուրանա»-ն` Լիբանանի Ֆիլհարմոնիք նուագախումբին ընկերակցութեամբ եւ խմբավարութեամբ մայեսթրօ Յարութ Ֆազլեանի, Էշրեֆիէի Սեն Ժոզեֆ եկեղեցւոյ մէջ:

Սեն Ժոզեֆ եկեղեցին լեցուած էր խուռներամ բազմութեամբ, շատեր ոտքի վրայ կանգնած մնացին` անշարժ ու անշշուկ, մինչեւ ելոյթի աւարտը, ըմբոշխնելով այս հանրածանօթ եւ մեծ համբաւ վայելած երաժշտական երկը, իր տարբեր մասերով: Գործի ներկայացման առանցքը կը կազմէր Հայաստանի Ազգային ակադեմական երգչախումբի բարձր մասնագիտական կատարումը, ընկերակցութեամբ` Լիբանանի Ֆիլհարմոնիք նուագախումբին, մայեսթրօ Յարութ Ֆազլեանի ճիպոտին ներքեւ:

Լիբանանի հայոց թեմի Ազգային առաջնորդարանին կողմէ բարի գալուստի խօսք արտասանեց Սալբի Սիմիթեան, որ հակիրճ ձեւով անգլերէնով ներկայացուց, թէ սոյն ձեռնարկները կը կատարուին Արամ Ա. կաթողիկոսի գահակալութեան 20-ամեակին եւ նորակերտ Ազգային միացեալ վարժարանի բացման առիթով, եւ այս զոյգ առիթները արուեստի եւ յատկապէս երաժշտութեան ուղիով արժեւորելը ստեղծեց Հայաստանի Ազգային ակադեմական երգչախումբը հրաւիրելու գաղափարը:

Նախքան համերգին սկսիլը, մայեսթրօ Յարութ Ֆազլեան անգլերէնով շնորհակալական իր խօսքը փոխանցեց բոլոր անոնց, որոնք ներդրում ունեցան այս համերգի կազմակերպման եւ յաջողութեան մէջ, յատկապէս Ազգային առաջնորդարանին, գլխաւորաբար Լիբանանի հայոց թեմի բարեջան առաջնորդ Գերշ. Տ. Շահէ Եպս. Փանոսեանին:

Մայեսթրօ Յարութ Ֆազլեան «Քարմինա Պուրանա» երկին մասին գրաւոր արտայայտութեան մը մէջ ըսած է, թէ այս երկին քաշողականութիւնը եւ ժողովուրդներու կողմէ վայելած համբաւին պատճառը հետեւեալներն են. նախ, որովհետեւ անոր գեղեցկութիւնը պարզութեան մէջ է: Հատուածին տարբեր բաժինները կազմուած են նոյն երաժշտութենէն: Ան իր կազմուածքով աւելի մօտ է ճեզի, ռոքի, քան սովորական դասական երաժշտութեան: Ասիկա կ՛արտօնէ, որ լսելը աւելի դիւրին եւ հաճելի ըլլայ եւ հետեւաբար աւելի հրապուրիչ: Երաժշտութեան ներդաշնակութիւնը` հարմոնին նոյնպէս գրուած է պարզ ձեւով: Երգչախումբի կատարման մեծ բաժինը ներկայացուած է միաձայն` իւնիսոն, իսկ երբ հարմոնիի բաժանումը տեղի կ՛ունենայ, ապա ան շատ պարզ ձեւով կը կատարուի, ուր շեշտը կը դրուի ու կը կեդրոնանայ հիմնական երաժշտական գիծին` մելոտիին վրայ, որ իր կարգին ճիշդ ձեւով կը կաղապարուի միջնադարեան բնագիրին: Երկրորդ պատճառը վարպետօրէն եւ գոյներով լեցուն դաշնաւորումն ու հարուածային բաժինի բազմազանութիւնն ու առատութիւնը, որ ամբողջ երկին կու տայ խանդավառութիւն, թափ եւ հարուածային կշռոյթ:

«Քարմինա Պուրանա» երկի երեք գլխաւոր մենակատարներն էին` Արծուիկ Դիմուրճեան (Սոփրանօ), Պերճ Քարազեան (Թենոր) եւ Գուրգէն Բաւէեան (Պարիթոն):

«Քարմինա Պուրանա» ելոյթի կրկնութիւնը տեղի պիտի ունենայ ուրբաթ,  25 նոյեմբեր 2016-ին, նոյն վայրին մէջ: