Սահակ Ա. Խապայեան Կաթողիկոսի օրով, 1930-ական թուականներուն, Անթիլիասի Կիլիկիոյ Կաթողիկոսարանին կից, հիմնուեցաւ Մեսրոպեան Վարժարանը։ 1963-ին, Խորէն Ա. Բարոյեան Կաթողիկոսի օրով, Մարտիկեան նախակրթարանի առաջին տեսուչը եղաւ Պետրոս Վրդ. Պէրպէրեան։

1981-էն սկսեալ, Մարտիկեան նախակրթարանը քայլ առ քայլ բարձրացաւ միջնակարգ վարժարանի աստիճանին։

Այդ տարիներուն, վարժարանին աշակերտութեան թիւը զգալի աճ արձանագրեց եւ Մայրավանքի շրջափակէն ներս գտնուող դպրոցին շէնքը՝ իր դասարաններով եւ խաղավայրով դարձաւ անբաւարար։

1984 -1985 տարեշրջանին, դժուարին այդ կացութենէն դուրս եկաւ Մարտիկեան Վարժարանը, շնորհիւ Գարեգին Բ. Կաթողիկոսի նախաձեռնութեան։ Արդարեւ, Վաչէ Մանուկեանի նուիրատուութեամբ գնուած եւ Կիլիկիոյ Կաթողիկոսութեան տրամադրութեան տակ դրուած Տըպպայէի ընդարձակ հողաշերտը (10,000 քառ. մեթր) եւ անոր վրայ գտնուող դպրոցական շէնքերը տրամադրուեցան Լիբանանի Ազգային Իշխանութեանց՝ այնտեղ փոխադրելու համար Ազգ. Մարտիկեան Վարժարանը։ Այս կարգադրութենէն ետք, Վարժարանը անուանուեցաւ բարերար Վաչէ Մանուկեանի հօր անունով, եւ 1985-1986 տարեշրջանէն սկսեալ դարձաւ Ազգային Եղիշէ Մանուկեան Երկրորդական Վարժարան։

1993 Հոկտեմբերին, պաշտօնապէս բացումը կատարուեցաւ արդիական մանկապարտէզին, որ կառուցուեցաւ բարերարութեամբ Վաչէ Մանուկեանին, որու մօր անունով կոչուեցաւ Ազգային Սիրան Մանուկեան Մանկապարտէզ:

1986-1987 տարեշրջանին վարժարանը տուաւ իր առաջին հունձքը եւ դարձաւ քոլեճ։

2005-ին, Րաֆֆի Մանուկեանի նուիրատուութեամբ ներկուեցաւ քոլեճի ամբողջ կառոյցը, կառուցուեցաւ տարրալուծարանը, փակ մարզասրահն ու համադրումներու եւ հոգեբանական խորհրդատուի սենեակը։ Հիմնովին փոխուեցան ուսուցչարանները, վերանորոգուեցան բակն ու կառատունը։

2011-2012 տարեշրջանին, սկսաւ բոլոր դասարաններու հիմնական վերանորոգութեան եւ արդիականացման աշխատանքը։ Նախարթարանի եւ միջնակարգի դասարաններէն ներս, հանգրուանային կերպով տեղադրուեցան «Interactive Board»-եր, մանկապարտէզի դասարանները ներկուեցան, ինչպէս  նաեւ վերանորոգուեցաւ կահոյքը եւ արուեստական խոտով ծածկուեցաւ քոլեճի ֆութպոլի դաշտը։

Դեկտեմբեր 2014-ին, բացումը կատարուեցաւ քոլեճի «Ժան Ապաճեան» արդիական գրադարանին։

ՏՆՕՐԷՆՆԵՐ

1963-1965                               Պետրոս Վրդ. Պէրպէրեան

1965-1966                               Ներսէս Ծ. Վրդ. Բախտիկեան

1966-1969                               Մեսրոպ Արք. Աշճեան

1969-1985                               Սարգիս Չոլոյեան

1985-1990                               Բաբգէն Փափազեան

1990-2005                               Մանուշակ Պոյաճեան

2005-2011                               Սեդա Պոյաճեան

2011- 2018                              Զոհրապ Ղազարեան

2018-2019                              Տնօրէն Խորհուրդ՝ Անի Ուրֆալեան-Բագրատունի, Սրբուհի Սարգիս-Ճէնանեան, Սեդա Պոյաճեան

2019-2023                             Անի Ուրֆալեան-Բագրատունի՝ Կրթական Տնօրէն, Սրբուհի Սարգիս-Ճէնանեան՝ Վարչական Տնօրէն

2023 -                                     Անի Ուրֆալեան-Բագրատունի

Քոլեճի խնամակալութեան անդամներն են՝ Վիգէն Քէսմէեան, Յովիկ Արսլանեան, Արազ Նաշալեան, Բիւզանդ Արսլանեան, Արազ Գոճայեան, Սեպուհ Քէօսէեան եւ Ռազմիկ Միքայէլեան:

2024-ին նշանակուած Քոլեճի նորընտիր խնամակալութեան անդամներն են՝ Վիգէն Քէսմէեան, Յովիկ Արսլանեան, Եղիա Ապաճեան, Պետիկ Զէյթունեան եւ Լիւսի Գարագաւուրեան: